Jim James

Den Jim James vun My Morning Jacket ass lo solo ënnerwee

15 Joer huet den Jim James mat senger Band My Morning Jacket zesumme geschafft, 6 Studioalben hunn si eraus bruecht a vill erlieft,.... mee lo war et anscheinend fir den Jim James un der Zäit, säin eegene musikalesche Wee ze fannen, ouni dobäi  Kompromësser anzegoen. Bei My Morning Jacket huet den Jim weder Bass nach Keyboard gespillt... lo hat hien Loscht, alles ze probéieren, an huet dofir ee Soloalbum gemaach. "Regions of Light and Sound of God", soll dat fäerdegt Wierk heeschen an de 5. Februar eraus kommen. Och eng Singleauskopplung gëtt et schonn: "Know Til Now".

Dead Can Dance

Dead Can Dance mellen sech zréck... no 16 Joer Paus, an hiren Comeback-Album verkeeft sech besser wéi all anert Wierk virdrun

16 Joer hu mer näischt vun hinnen héieren - lo hunn Dead Can Dance een neie  Studioalbum eraus bruecht. En heescht "Anastasis" a kënnt pénktlech fir de Start vun hirer Welttournee. Am Joer 1996 haten d’Lisa  Gerrard an de  Brendan Perry hir lescht CD op de Maart bruecht, du koum nach e Resumé vun hirem Wierk op enger CD-Box an dono hunn di 2 Bandmemberen eng Solocarrière ageschloen . Pläng fir een neien Album als Duo hunn si ëmmer nees dementéiert, lo ass et awer dach sou wäit: Dead Can Dance hunn een Album eraus bruecht, dee kléngt wéi wann an de leschte 16 Joer näischt geschitt wier . Di musikalesch Welt vun der Band schéint weiderhin lassgeléist ze sinn vun Raum an Zäit.

 Hei ass en Extrait aus hirem neien Album- an nei Musek vun Dead Can Dance gëtt et och a menger Sendung

Bloc Party: Octopus

4 Joer nom leschten Studioalbum gëtt et lo nees een éischt Liewenszeechen vun Bloc Party. Mëtt August presentéieren si hiren neien Album mam schlichten Titel „Four“ . Virop stellen si schonn mol eng gratis Remix-Versioun vun der éischter Single „Octopus“ als gratis Download an d’Netz. An hei dreiwen déi 4 Briten genee deen entspaanten Elektro-Rock virun, mat deem si viur 4 Joer opgehalen hunn.

WhoMadeWho: The Sun

WhoMadeWho kombinéieren an hiren Lidder Pop an Disco - eng Mëschung, déi besonnesch live uerdentlech era geet. Awer och um Album funktionéiert dee Stilmix – dat beweist den däneschen Trio mat sengem aktuelle 5. Album "Brighter". Wéi schonn op den Alben virdrun bleiwen WhoMadeWho hirem Elektro-Style weiderhin trei. „The Sun“ heescht lo déi nei Single vun WhoMadeWho, an am Video dozou beschäftegen di 3 Dänen sech mat folgender Fro: "Wéi eng 10 Saachen sollt ee gemaach hunn,ier ee 40 Joer al gëtt:

WhoMadeWho hunn an hirem Video 2 Singelen unenee gesat. "The Sun" fänkt no 5 Minutte 22 un.

 

Allo Darlin

Di britesch Indie-Pop-Band Allo Darlin’ mat der australescher Frontfra Elizabeth Morris huet scho virun 2 Joer mat hirem 1. Album opmierksam gemaach. Lo sinn si zréck mam Nofolger an der aktueller Singel "Carpicornia".