Mee: De Fussballmount a Groussbritannien

De Mount ass nach net eriwwer an trotzdem ass schonn eng jett geschitt an der Britescher Fussballszeen. London Calling mescht den Update!

De Mee ass vir Fussballfans e wichtege Mount, ginn dach souwuel d’Europa League wéi och d’Champions League Finalen dëse Mount gespillt an déi éischt Rumeuren iwwert Transferten fänken un. Dat ass och hei op der Insel net aneschters, an dach muss een soen, dass obwuel de Mee nach guernet eriwwer ass, et sech elo schonn ëm een vun de wichtegste Méint an der britescher Fussballsgeschicht säit laangem handelt.

Lauschtert hei de Reportage: 

Ugefangen domadder, dass de laangjäregen Manager vu Manchester United, den Alex Ferguson, virlescht Woch seng Demissioun bekannt ginn huet. Dass e Manager no enger Saison d’Handduch gehäit, ass  jo näischt besonnesch, mee den Alex Ferguson huet Manchester United säit 1986 gemanaged an seng Mannschaft zu sëllechen Premier League an Champions League Victoiren gefouert.

Wéi wann dat net scho Schock genuch wier, esou huet sech och nach eng aner Gréisst aus dem britesche Fussball dozou entscheed mat senger Carrière opzehalen, nämlech den David Beckham. Och wann de Beckham technesch gesinn, guerkee Fussball méi héi a Groussbritannien spillt, esou zielt hien hei trotzdem nachemmer zu deene ganz Groussen. Et gëtt zeguer gemunkelt, dass hien elo vun der Queen zum Ritter geschloe wärt ginn, eng Éier, déi dem Alex Ferguson scho viru 14 Joer zoukomm ass.

Mä et sinn awer och méi erfreelech Nouvellen dëse Mount ginn. Esou huet zum Beispill de Londoner Club Chelsea, d’Europa League Final läschte Méindeg zu Amsterdam gewonnen. Domadder ass d’Chelsea deen éischte Club, deen souwuel den Europa League wéi och den Champions League Titel noeneen droen däerf. Wann och net all ze laang, well e Mëttwoch gëtt dann d’Champions League Final am Wembley Stadion hei zu London ausgedroen.

D’Briten, déi sech och haut nachemmer domadder brüsten, dass sie déi Däitsch am zweete Weltkrich geschloen hunn, verquëssen et net esou ganz, dass ausgerechent zwou däitsch Equipen bei hinnen ëm den Titel spille mussen. Ëmmerhinn huet Bayern München nach eng Rechnung mat de Briten op, mä op sie och effektiv gewannen, gesi mär wuel e Samsteg denowend.

Twitter: @EldoLondon an @SergeReuter

Eurovision Song Contest 2013

Et ass altness esou wäit: De Eurovision Song Contest 2013 ass nächste Weekend. Groussbritannien schéckt d'Bonnie Tyler a Schweden. Eng Analyse.

Dëse Samschdeg ass et nees esou wäit: De Eurovision Song Contest 2013 fënnt zu Malmö statt a vir déi eng gehéiert en zu engem fixe Rendez-vous am Museksjoer a vir déi aner kann dat Ganzt net schnell genuch erëm eriwwer sinn. Och d'Meenung vun de Briten iwwert de Concours ass ähnlech - mam Ënnerscheed, dass Groussbritannien jo och effektiv beim Spektakel matmécht. Mä, no de Flops vun de läschte Joeren steet dëst Joer net manner wéi d’Rettung vun der Britescher Éier um Spill.

Lauschtert hei der Reportage:

Eng Natioun, déi der Welt Muséksgréissten ewéi d’Beatles, d’Rolling Stones oder Muse geschenkt huet, bréngt et einfach net fäerdeg beim Eurovision Song contest opmanst eng hallefweegs anstänneg Platz ze beleeën. Dat sinn sech wuel och déi Responsabel bei der BBC bewosst a setzen all hier Hoffnungen dëst Joer an déi bekannte Sängerin Bonnie Tyler, déi jo an den 80er weltwäit bekannt gouf duer Hits wéi Total Eclipse of the Heart, Holding out for a Hero an if you ever need me.

No dem Engelbert Humperdinck d’läscht Joer, schéngt Groussbritannien och 2013 also nees op en éischter eelert Semester ze setzen. Mat der seichter Country Pop Balad “Believe in me” well déi 61 Joer al Sängerin nächste Samschdeg zu Malmö ofraumen. Als ee vun de permanente Finalisten gëllt sie als sécher gesat a muss sech net namol an der Halleffinall beweisen.

Terribel vill Drock, laascht da generell och erëm net um Bonnie Tyler. No der desastréiser zweetleschter Platz 2012 kann et jo eigentlech net méi schlëmm vir d’Brite kommen. Mee, vläit maachen d’Briten wéi esou oft hier Rechnung ouni de Rescht vun Europa a kréien dofir hier Quittung. Op et herno wierklech "Royaume-Uni, douze points" heescht, gesi mär dann e Samschdeg denowend.

Wat haalt Dir vum Bonnie Tyler sengem Lidd? Mengt Där hat huet eng Chance op d'Victoire?

Twitter: @EldoLondon an @SergeReuter

Der Queen hieren "Portrait"

Nom Desaster vum Kate sengem Portrait, huet d'Queen elo den nächsten, wéineg schmeichelhafte Portrait gemoolt kritt. D'Briten si verzweiwelt!

D’Briten kennen et einfach net gleewen. Nodeems d’Kate jo Ufanks dës Jores op sengem éischter royalen Portrait regelrecht massakréiert gouf an de Kënschtler doropshin massiv Kritik aus der Ëffentlechkeet krut, hätt ee kéinten denken, dass all zukünfteg Biller vun der Kinneksfamill ëmsou méi perfekt giffe ginn. Mee nee, do hunn d’Briten d’Rechnung ouni den Dan Hall gemeet. Säi Portrait vun der Queen gouf elo virgestallt an d’Briten wëssen netméi wat se dozou nach soe sollen.

Lauschtert hei der Reportage:

An de Medien gëtt de Portrait eenheetlech als e Super-GAU duergestallt an och déi Responsabel am Palais sinn sech wuel bewosst wéi schlecht dat Bild ass. Dohier iwwerrascht et dann och keen, dass d’Bild, net ewéi üblech, am Buckingham Palace virgestallt gouf, mee zu Cardiff am Rugby Stadion. Do wärt de Portrait dann och an Zukunft ze bestaune sinn, wäit ewech vu London, a wäit ewech vun all Tourist. Mee och Spectateuren, déi de Portrait mëttlerweil gesinn hunn, sinn entsat. Sie gëff ausgesinn, wéi eng Karikatur, seet een Sportsfrënd, woubäi en aneren bemierkt, dass hier Statur a besonnesch hieren Uewerkierper, eng ganz komesch Proportioun huet.

Op dem Portrait selwer gesäit een eng al an zerknautsche Queen mat engem knaschtege Gesiicht an déiwen Aereng. Iwwerhaapt wierkt sie zimlech männlech an eng bekannte Britesch Dageszeitung seet se giff zwar ausgesinn wéi eng Queen, mee leider wéi eng Drag Queen. Den Dan Hall ass dann och mat 32 Joer dee jéngste Kënschtler, deen jee en offiziellen Portrait vun der Queen molen duerft. Béis Zongen soen elo, dass den Dan Hall wuel besser nach e puer Joer üben hätt sollten.

De Brite graut et elo scho virun deem nächsten kinneklechen Portrait, dat héchstwahrscheinlech dem William a Kate säi Kand wärt ginn. Wat d’Queen selwer vum Bild hält ass awer net gewosst, wahrscheinlech ass et och besser esou.

Twitter: @EldoLondon an @SergeReuter

Vakanz an England?

An d'Vakanz geet en jo gären emol op ganz besonnesch Destinatiounen. Groussbritannien ass do seelen e Favorit - net emol bei de Brite selwer.

Wann een emol vu London ofgesäit, da ginn et honnert Grënn wisou een eigentlech net hei op d’Insel an d’Vakanz komme wéilt: D’Wieder ass insgesamt zimlech schlecht, d’Briten sinn lo net onbedéngt bekannt vir hier grouss kulinaresch Spezialitéiten an niewebäi ass Groussbritannien wéinst dem staarken Pond och nach immens deier. Do flitt een da léiwer vir de selwechte Präis un d’Mëttelmier, wat déi meeschte Briten jo och maachen.

Lauschtert hei de Reportage:

Mee wann net emol d’Brite selwer an hierem Land Vakanz maache wëllen, wéi soll dann iwwerhaapt iergendeen Loscht op Groussbritannien hun? Dat ass eng Fro, déi sech och den Engleschen Tourismusverband gestallt an dowéinst en nei Guide publizéiert mat 101 Attraktioun, déi ee besiche soll, ier een am Ausland Vakanz mécht.

Dorobber befannen sech nieft den üblechen Verdächtegen wéi Stonehenge oder den Nullmeridian zu Greenwich och éischter ongewéinlech Attraktiounen ewéi d’Kéiscourse zu Gloster bei der e Kéis e Bierg erofgerullt gëtt an een da probéieren muss, dësen ze fänken. Och soll een eng Kéier e ganze Weekend dem Fussball ze widmen, sech vir déi berühmten Päerdscourse zu Ascott schick man oder sech mat original Briteschem Cider eng ustrécken. Also alles richteg traditionell Britesch Aktivitéiten.

Weem dat elo zouseet, dee kann sech hei déi komplett Lëscht als PDF eroflueden (klickt hei)

Twitter: @EldoLondon an @SergeReuter

David Bowie is...

Den David Bowie ass e Weltstar an eng Ikon vun der Britescher Popkultur. Elo widmet sech eng extrem populär Ausstellung sengem Liewen.

Den David Bowie huet bis elo iwwert 140 Milliounen Alben verkaf a gouf vun der BBC zu engem vun de wichtegste Briten op der Welt ernannt. Diverse Eskapaden hu laang Zäit säi Liewe geprägt mee elo no 10 Joer Paus huet hien sech mat engem neien Album “The next Day” zréckgemellt, deen direkt op Nummer 1 vun de Briteschen Charts geklommen ass. D’Briten veréieren den David Bowie also weiderhin an do erweist sech eng nei Austtellung mam Numm "David Bowie is..." als ganz besonneschen Hit.

Lauschtert hei der Reportage:

De Victoria and Albert Museum widmet sech nämlech säit kuerzem an enger grousser Retrospektive dem Kënschtler a sengem Liewen, dat bis elo net emmer einfach war. Den David Bowie war nämlech net nëmmen Museker, mee och nach Schauspiller, a Produzent vu sëllechen Welthits. Hien huet mat Musekslegenden wéi dem John Lennon oder Queen zesumme geschafft an déi Britesch Queen virun de Kapp gestouss, wéi hien sech trotz der Offer, net vun hier zum Ritter schloe loosse wollt.

D’Curateure vun der Ausstellung kruten exklusiv Zougang zum David Bowie sengem Archiv an hunn sech do wéi et schéngt richteg ausgetobt. Iwwert 300 Géigestänn hu sie erausgesicht a vir d’Ausstellung zesummegedroen. Dës erweist sech mëttlerweil as richtege Goldgrëff vi den Victoria and Albert Museum. Sämtlech online Tickete si schonn ausverkaf an dat obwuel d’Ausstellung nach bis Mëtt August leeft. Et ginn awer nach Ticketen am Musée selwer, mee dofir muss ee fréi opstoen a sech géint 7 Auer mueres an d'Rei stellen.

Et gëtt also kloer, dass och no 40 Joer dem David Bowie säi Bann hei a Groussbritannien nachemmer net gebrach ass an dës nei Ausstellung ënnersträicht dat ëmsou méi. 2013 schéngt also dem David Bowie säi grousst Comeback Joer ze sinn a wann een de Rumeueren no geet, kennt dëst Joer anscheinend nach en zweeten Album eraus. D'Fans hätte sécherlech näischt dergéint.

Twitter: @EldoLondon an @SergeReuter